Pantun Madura 2

Pantun Madhurâ

(Les-bâlessan Pantun)

Pantun sè bhâḍhi ka'ator aropa'aghi pantunna rèd- morèd sè abâles nalèka bhâdhân kaulâ ngèrèm berta (kabhâr) neng grup kellas. Bâḍâ jhughân sè nyangghemmè (mengomentari) satatus bhâdhân kaulâ neng medsos WA. Sè saka'ḍinto sadhâjâna aropa'aghi sala sèttong tarèka ka'angghuy ngajhâk ngangoḍâdhân sopajâ lèbur tor tarèsna ḍâ' bhâsa Madhurâ. 

Pantun bhâdhân kaulâ maèmot bâkto ka'ḍissa' jhâ' arè lagghuna ulangan. Pantunna saka'ḍinto. 

Mellè palappa ghâbây ghângan

Mellè cabbhi arè salasana

Jhâ' loppa lagghuna ulangan

Ajhâri onḍhâgghâ bhâsana

                                 (Ghuru)

Bâḍâ orèng èntar ka polo

Èntar ka polo aḍu ma' nyaman

Ulangan nèka ghun nyarè ngello

Torè ta' usa  bâdḍâ ulangan

                             (Moh. Raihan Samporana XII MIPA 1)

Mellè pangerrat bân saḍâ'na

Panas arè pamolèna

Malarat ghi' ḍâ'-aḍâ'na

Buḍi arè karè bhunganna

                             (Ghuru)

Bada kata' è Saroka

Acellot ta' abârna

Kaulâ ta' terro ngellowa

Tapeè terro nilai samporna

                             (M. Dillon XII MIPA 1)

Raihan Samporna labu napang

Neng è Bhânjhâr ka ḍâjâna

Nilai samporna rèya ghâmpang

Poko' bâ'na ajhâr pamana

                                    (Ghuru)

Dâ' bârung monḍhut mènnya' tana

Ka'angghuy amassa' so Ébhuna

Sopajâ bhunga sakabuḍina

Nyara paghâmpang ulanganna

                                 (Moh. Raihan Samporana XII MIPA 1)

Pantun saterrossèpon mamolan ḍâri status bhâdhân kaulâ neng medsos WA sè èsangnghemmè (dikomentari) sareng morèd. 

Ghu-lagghu nyapowè tanèyan

Ḍâunna ghâgghâr karè mèlè

kaulâ kerrong èyajhâri sampèyan 

Èyatorèt abâli ngajhâr polè

🙏😁

                        (Rosa Amelia XII Bahasa 1)

Mellè pao ma' mellè kaèn

Ca'na Ulum ḍu antossaghi

Ta' terro ngajhârâ kellas laèn

Kèng kurikulum sè nantowaghi

                                         (Ghuru)

Bân-abânna ka Sorbhâjâ

Mallè corèt kaèn katun

Rassa bhunga taḍâ' paḍâ

Mon tang morèd lèbur apantun

                                 (Ghuru)

ajhalan soko dapa' ka bluto

dapa' ka bluto entar nyassa

engghi manabi ka'dinto

nangeng jhek loppaaghi 12 bahasa

                                         (Rosa Amelia XII Bahasa 1)

ka lenteng mellea calana

sokona sakek eghiba ngonjhur

kaula ghun nyo'ona du'ana

malar mogha dheddi reng pojhur

                                            (Rosa Amelia XII Bahasa 1)

Palappa ḍu ma' palappa

Arè Salasa kalambhi potè

Soro loppa ta' kèra loppa

Kellas Bahasa bâḍâ è atè

                                     (Ghuru)

Molong cabbhi ta' akalambhi

Mèlè ḍâḍâr bhâdḍhâi peltong

Pandu'a mandhi ka bâ'na kabbhi

Malar mandhâr dhâddhi rèng ontong

                                     (Ghuru)

Ajhâr nolès pantun è ka'ḍinto

Pantun Madura

Pantun Madhurâ

(Les-bâlessan pantun)

Pantun sè bhâḍhi ka'ator mamolan ḍâri bhâdhân kaulâ nalèka ngèrèm parènta neng sala sèttong WAG rèd-morèd sè ètoro'è paantun, saterrossèpon pas èbâles sareng rèd-morèd. Sè ka'ḍimma ka'ḍinto aropa'aghi sala sèttong tarèka bhâdhân kaulâ ka'angghuy mancèng para ngangoḍâdhân sopajâ tombu rassa tarèsna ḍâ' bhâsa Madhurâ saèngghâ bhâsa Madhurâ tep-tep nyelbhi' nyolbhu' tombu jhenno ta' kantos èlang sèrna noro' ghibâna jhâman. 

 

Sangajâ bhâdhân kaulâ nolès berta ngangghuy bhâsa Indonesia amarghâ ka'ḍinto papolongan ḍâri pan-saponapan kellas sè sabâgiyân bâḍâ ta' èyajhâri bhâdhân kaulâ. Tor WAG ka'ḍinto bâḍâ pan-saponapan ghuru sè asallèpon ḍâri Jhâbâ. 

Bertaèpon kadhi ka'ḍinto. 

Assalamu alaikum wr. wb.

Karena salah salah satu rundown acara kita yang ke UNESA adalah Ziaroh (tawasul) di Asta Syaikhona Kholil Bangkalan, maka bagi seluruh siswa, terlebih dahulu (sebelum ziaroh ke Asta Waliyullah) kalian ziaroh ke Asta para orang tua atau sesepuh masing-masing di rumah. Karena Sekian banyak ḍhâbu para Kyai, para ulama', percuma kita Ziaroh ke Asta Para Wali jika ke para sesepuh sendiri lupa atau tidak ziaroh. Dan memang ini sejalan dengan yaang ada di Bahasa Madura, Bhupa' Bhâbhu' Ghuru Rato. Jadi orang tua, para sesepuh kita dulu, baru guru. Maka dari itu, jika dalam minggu ini kalian tidak ziaroh ke Asta sesepuh sendiri, alangkah lebih baik jika nanti sore disempatkan ke Asta sesepuh apabila Asta para sesepuh dekat. Jika kalian kos, dan rumahnya jauh, maka paling tidak mengaji terlebih dahulu dan dikhususkan ke para sesepuh kalian yang sudah wafat.

 

Ka Baluto nompa' motor

Ka Jhâbâ'â Satto Bâghi

Saka'ḍinto sakadhâr pamator

Sopajâ'a èlampa'aghi

 

Mator sakalangkong

Wassalamu alaikum wr. wb.

 

 

Wa'alaikumussalam wr. wb.

 

Motor Hongkong ta' kèra lemmot

Kapalla dhuli  pasiyâppaghi

Mator sakalangkong  ampon maèmot

InsyaAllah bâḍhi  élampa'aghi

                             (Moh. Raihan Samporna XII MIPA 1)

Ajhâri jhughân carana nyerrat (nolès) pantun 

Adhâghâng nyaré  ontong ghâbay jhuwâlânna

Jhuwâlânna ghun leppet ma'olle ta' malarat

Ghun séttong sé réng seppo arep dâri pottrana

Dhuwâ ana' nyopprè paḍâ salamet dhunnya ahèrat

   (Moh. Raihan Samporna XII MIPA 1)

 

Nambi' topa' ḍâ'bârâ'na

Ghângan kowa bujâ cabbhi

Pajhât teppa' oca'na bâ'na

Dhuwâ rèng towa rèya mandhi

                                           (Harwiyanto)

Kowa tarnya' ghângan labu

Akowa'a ma' nasè' kabhuli

Apa polè la bânnya' ḍhâbu

Rèng towa ridâ' Allah ngabbhuli

                             (Harwiyanto)

 

Ngakan nasè' sareng kangkong

Numpa’ motor nyalèp kanan

Èngghi mator sakalangkong

Moghâ salamet  è parjhâlânan

              (Ilham  Maulana XII MIPA 2)

 

Jâng-lajângan ebbân sèrep

Motor ekkol mowa' bukkol

Salamet parjhâlânan sè èyarep

Mangkat bungkol ḍâteng bungkol

                             (Harwiyanto)

 

Ngakan kangkong  sareng tarnya'

Pa’ Salam ka kottha mellè ès bâtu

Mator sakalangkong ampon masenga’

Walaikumsalam warohmatullahi  wabarakatuh

                             (Bram XII MIPA 2)

 

Ka Sarongghi mellè katun

Dhilâ  èbelli katunna gherrâ

Ca-kanca ambu jhâ’ apantun

Mara pasiyâp sè ajhârâ

                             (Tri Dewi XII IPS 5)

 

Mellè jhuko' sabbhân lagghu

Pamolèna narèma sorat

Nyarè èlmo paongghuwân ongghu

Ka’angghuy sangona è ahèrat

                             (Angga Zeno XII IPS 5)

 

Mellè kaèn mèlè maghi'

Ka Sorbhâjâ asarong Atlas

Pantun sè laèn èbâlesssa ḍâgghi'

Sabâb ghi' bâḍâ è ḍâlem kellas

                              (Harwiyanto)

 

Saka'ḍinto les-bâlessan pantun bhâdhân kaulâ sareng rèd-morèd. Malar moghâ sastra Madhurâ terros kaopèn neng maghârsarè ta' so'è sorem, nangèng malar mandhâr laangkong bhinar cengngar, asonar kantos ahèr jhâman.  

KISI-KISI PAT BHÂSA MADHURÂ 2022-2023 (KELAS XII)

Ka'ator ḍâ' rèd-morèd SMADA Songennep èyatorè panjhenengngan samè masamakta, maranta ka'angghuy ngaḍhebbhi PAT Bhâsa Madhurâ kalabân ajhâr apandhuman ḍâ' kisi-kisi sè bhâḍhi ka'ator. Ajhâr paghumatè tor ghu-ongghu atè, tor jhâ' kalèp adu'a jhughân nyo'on du'a ḍâ' rèng seppona nyopprè kèngèng hasèl sè samporna. Malar moghâ èlmona aghuna tor barokah. 

Kisi-kisi PAT Bhâsa Madhurâ èyatorè pècè' è ka'ḍinto!

KISI-KISI PAS/PENILAIAN SUMATIF 2022

Ḍâ' rèd-morèd SMADA èyatorè bukka' otabâ ponḍhut kisi-kisi è bâbâ ka'ḍinto ka'angghuy masamakta PAS arè lagghuna. 

KISI-KISI PENILAIAN SUMATIF/PAS FASE E (KELAS X) èyatorè ponḍhut è ka'ḍinto!

KISI-KISI PAS KELAS XII èyatorè ponḍhut è ka'ḍinto!

SILABUS BAHASA DAERAH JATIM (JAWA, MADURA)

Ka'ator ḍâ' tan-tarètan sè bhuto Silabus Bahasa Daerah (Jawa, Madura) èyatorè ponḍhut neng bâbâ ka'ḍinto. Tanto silabus sè ka'ator ka'ḍinto èghuna'aghi neng Kurikulum 2013 (Kellas XI, XII). Amarghâ samangkèn ampon bâḍâ Kurikulum anyar èngghi ka'ḍinto Kurikulum Merdeka, sè tanto ampon bâḍâ CP (Capaian Pembelajaran. 

SILABUS BAHASA DAERAH SMA/SMK JAWA TIMUR èyatorè ponḍhut è ka'ḍinto!

CP (CAPAIAN PEMBELAJARAN) BAHASA DAERAH JAWA TIMUR (JAWA, MADURA)

Ka'ator ḍâ' tan-tarètan ghuru bhâsa Madhurâ otabâ Jhâbâ, Capaian Pembelajaran Bahasa Daerah Jhabâ Tèmor alhamdulillah ampon èpaterbi' sareng Dinas Pendidikan Provinsi Jhâbâ tèmor mènangka pandhuman sadhâjâ tantarètan ghuru Bhâsa Jhâbâ tor Madhurâ ḍâlem molang neng sakola'annèpon bâng-sèbâng ngabidhi SD/MI, SMP/MTs, SMK/SMK/MA tor sè sadhârâjhât. 

CP BAHASA DAERAH JAWA TIMUR èyatorè pècè' è ka'ḍinto!

RPP BAHASA MADURA KELAS XII

RPP BHÂSA MADHURÂ KELLAS XII 

Tan-tarètan ghuru bhâsa Madhurâ sè bhuto RPP Bhâsa Madhurâ kellas XII èyatorè oladhi tor ponḍhut è bâbâ ka'ḍinto.  

RPP Bhâsa Madhurâ kellas XII èyatorè pècè' è ka'ḍinto!