Teknik Menjadi Dalang yang Baik

Caraѐpon Dhâddhi Ḍhâlâng sѐ Saѐ (Teknik Menjadi Dalang yang Baik)

          Sabellunnèpon panjhennengngan ajhâr dhâdhhi ḍhâlâng sè saè, nyara kaèmodhi tor kaghâli ḍhimèn ponapa sè èmaksod topèng ḍhâlâng. Topèng ḍhâlâng aropa’aghi sala sèttong macemma sennè tatèngghun sè bâḍâ neng Madhurâ sè abhângon dramatik otabâ ngatorraghi carèta tor sadhâjâ  panjhâk otabâ sè amaèn ngangghuy tokop/ topèng sè akor sareng bâgiyânnèpon è ḍâlem carèta. Èsambhât topèng ḍhâlâng amarghâ mowa topo karè kopèng. Sadhâjâ sè amaèn ngangghuy tokop otabâ topèng. Tor sadhâjâ panjhâk ta’ aḍhâ-kanḍhâ, namong bhâdhân sè aghuli. Sadhâjâ panjhâk ngalakonè ponapa sè èḍhâbuwâghi sareng ḍhâlâng kantos kadhiyâ abâ’na dhibi’ sè aḍhâ-kanḍhâ. Mèlaèpon sè èsambhât ḍhâlâng èngghi ka’ḍinto orèng sè ngator tor majhâlân carèta ḍâlem topèng ḍhâlâng.  

Caraèpon dhâddhi ḍhâlâng sè saè kaangghuy sè bhuru ajhâr/pemula

1.    Ngagungè nèyat tor pangaterro kaangghuy dhâdhhi aḍhâlâng.

2.    Carana maos/ maca ca’-oca’ kodhu lerres. Amarghâ manabi sala maos bisa laèn artè otabâ taḍâ’ artèna. (artikulasi/ pelafalan)

3.    Ongghâ toronna otabâ laghuna sowara kodhu lerres. Maksottèpon jhârna’ antara okara pètanya, pasoro, tor samacemma nyopprè orèng sè mèrengngaghi nganghâli otabâ ngartè ḍâ’ èssèna carèta jhughân ta’ arassa bhusen. 

4.    Langkong saè ngaghâli otabâ onèng abhidhâ’-bhidhâ’âghi sowarana panjhâk/ tokoh sèttong sareng panjhâk/tokoh sè laèn.

Ompamaèpon carèta neng Karaton Ngamerta, bâḍâ Rato sè kasambhât Punto Ḍèwo Ḍârmo Kusumo bâtek sowaraèpon manabi abu-ḍhâbu lekkas/ ceppet tor èkabidhi kalabân oca’ è è. Alè’na Rato èngghi ka’ḍinto Sèno Walkuḍoro, sowarana rajâ, manabi abu-ḍhâbu masthè èkabidhi kalabân oca’ wâ...., yâ..... . Bâḍâ jhughân alè’na Rato sè kasambhât Arjuna, manabi abu-ḍhâbu lemmes, alos tor lèrè/ rarem jhughân èkabidhi kalabân oca’ waḍḍhu, manabi sowara binè’ tanto laèn laghuna, sareng salaènnèpon.

5.    Kodhu ongghu-ongghu ngaghâli ḍâ’ bâtek sabbhân-sabbhân panjhâk/tokoh nyoprrè ḍâlem abu-ḍhâbu ḍâlem ḍhâ-kanḍhâna/dialog pajhâk/tokoh akor sareng bategghâ panjhâk.

6.    Ḍhâlâng ta’ kèngngèng ghâḍhuwân rassa toḍus.

7.    Kodhu pabânnya’ latèyan.

8.    Bânnya’ anya-tanya ḍâ’ ḍhâlâng sè ampon saè tor kalonta mènangka ḍhâlâng otabâ ḍâ’ orèng sè onèng.

Rekaman belajar menjadi ḍhâlâng klik di sini!

Video rekaman topèng ḍhâlâng klik di sini!

CONTOH VIDEO TOPÈNG ḌHÂLÂNG YANG LAIN BISA DICARI DI YOUTUBE.

PÈLÈYAN BÂCA’AN CARÈTA ADDHUWÂN ḌHÂLÂNG MADHURÂ

PÈLÈYAN BÂCA’AN CARÈTA ADDHUWÂN ḌHÂLÂNG MADHUR  SMAN 2 SONGENNEP

Ḍâ' rèd-morèd SMADA Sumenep sè ngèrèng addhuwân ḍhâlâng madhurâ èyatorè mèlè sala sèttong carèta (mèlè carèta 1, 2, 3 otabâ 4) sè bhâḍhi ècarèta'aghi ḍâlem addhuwân ḍhâlâng. 

Download bâca'an pèlèyan bâca'an carèta addhuwân ḍhâlâng madhurâ  ÈYATORÈ PÈCÈ' È KA'ḌINTO!

REEMDI TES FORMATIF TEMBHÂNG MACAPAT

Assalamu alaiku wr. wb. 

Ḍâ' rèd-morèd sè nilayya ta' napa' 75 èyatorè tembhâng sè èserrat panjhennengngan neng Lalampa'an 3:

1. Tantowaghi ghuru laghu sareng ghuru bilânganna,  tor bânnya'na paddhâ ḍâlem sapaddhâ anḍhegghân. 

2. Jhârbâ'âghi èssèna. 

Serrat ḍâ' dhâlubâng, parèngè asma sareng kellas, èkompollaghi ḍâ' sakola'an lagghuna, Kemmès 6 Mei 2021 palèng tellat pokol 11.00 WIB. 

Mator sakalangkong. 

NILAI PAT 2021 (KELLAS X)

Ka'angghuy ngoladhi nilai PAT èyatorè pècè' è ka'ḍinto!

TES FORMATIF 2 SEMESTER 3 (KBC)

Èyatorè jȃwȃb sobâl-sobâl  ѐ bȃbȃ panѐka kalabȃn lerres!

1.    Ponapa sè èmaksod kabhuḍhâjân?

2.    Èyatorè sebbhuttaghi tor jhârbâ’âghi 3 macem kabhuḍhâjân Madhurâ!     (Sekor 15)

3.    Ponapa sè èmaksod kabhuḍhâjân ghutong rojhung tor ponapa bhuktèna jhâ’ è Madhurâ bâḍâ kabhuḍhâjân ghutong rojhung?

4.    Èyatorè sebbhuttaghi 3 macem kabhuḍhâjân Madhurâ sè aropa lalampan upacara adhât!

5.    Ponapa maksod tor tojjhuwân èbhu maghâgghâr tellor ḍâlem upacara adhât pèlèt kanḍung?

6.    Ponapa sè èmaksod upacara adhât pèlèt kanḍung?

7.    Èyatorè sebbhuttaghi bâtegghâ upacara adhât pè lèt kanḍung! (Sekor 15)

8.    Èyatorè jhârbâ’âghi kadhi ponapa tata kramana orèng atamoy! (Sekor 20)

 

 Pènter Soccè, Bhuddhi Tèngghi,

Ngèlmo paḍi

Ajhi larang, Kabbhi Monjhung 

KISI-KISI PAT BAHASA MADURA KELAS X 2021 (UNTUK SISWA)

KISI-KISI PAT BHÂSA MADHURÂ KELLAS X 2021 

Ḍâ' rèd-morèd  èyatorè download tor ajhâr noro' kisi-kisi PAT ka'ḍinto nyopprè kèngèng nilai sè saè. 

Sabellunnèpon panjhennengngan monḍhut kisi-kisi PAT, èyatorè maos pètodhu è bâbâ ka'ḍinto nyopprè èparèngè kalancaran ḍâlem ngèrèng PAT tor tekka hajhât kèngèng èlmo sè barokah: 

1. Manabi ajhârâ kodhu ngaghungè wudu'. 

2. Sabelluna ajhâr jhughân lastarèna kodhu maos du'a. 

3. Nyo'on du'a ḍâ' rèng seppo ḍuwâ'na. 

4. È malem sabellunna ujiyân ngèrèm fatihah ḍâ': 

    - Kanjeng Nabi Muhammad 

    - Rèng seppo ḍuwâ' (Manabi sala sèttong rèng seppo bâḍâ sè ampon sèdhâ, saèna ngatorraghi 

      fatihah  sèttong èbâng). 

    - Sadhâjâ ghuru ngabidhi ghuru TK kantos S SMA, kong-langkong ghuru ngajhi. 

5. Sabellunna mangkat ḍâ' sakola'an amèt tor ngatorè songkem bhâktè kalabân cara asallim ḍâ' rèng seppona.È sèttong bâkto langkong saè manabi maccoè padhâna rèng seppo binè', nyo'on ridâ'na, torè aèngnga èḍhâ'âr.  

6. Pabânnya' adu'a ḍâ' Ghustè Allah, kong-langkong nalèka bâḍâ tengnga malem salastarèna asolat tahajjut sareng solat hajhât. 

Malar moghâ panjhennengngan kèngèng èlmo sè barokah, kèngèng nilai sè saè tor tekka hajhât. AAmiin....!

DOWNLOAD KISI-KISI  PAT BHÂSA MADHURÂ KELLAS X ÈYATORÈ PÈCÈ' È KA'ḌINTO!

CARA MENULIS EJAAN BAHASA MADURA YANG BENAR

CARAÈPON NYERRAT TOLÈSAN BHÂSA MADHURÂ

Kabid ḍhimèn kantos samangkèn ghi’ bânnya’ rèng Madhurâ, saè ngangoḍâdhân otabâèpon rèng seppo sè sala ḍâlem nolès tolèsan bhâsa Madhurâ. Saè bânnya’ èpangghi’i è bânner, sorat onjhângan, tolèsan è motor (mobil), media sosial akadhi fb, WA, IG, tor salaènnèpon.  Parkara ka’ḍinto tanto andhâddhiyâghi rassa toḍus manabi rèng Madhurâ ta’ onèng nolès tolèsan bhâsa madhurâ sè lerres. Pramèla ḍâri ka’ḍinto, bhâdhân kaulâ sa’at samangkèn bhâḍhi ngatorraghi jhâjhârbâ’ân anglèbâdhi tolèsan sè sakonè’ ka’ḍinto ngèngèngè caraèpon nyerrat tolèsan bhâsa Madhurâ.

Manabi bhâḍhi nyerrat tolèsan bhâsa madhurâ langkong ḍhimèn kodhu ngaghâli/onèng ḍâ' macemmèpon aksara bhâsa madhurâ. Mèlaèpon, nyara kaghâli jhâjhârbâ’ân è bâbâ ka’ḍinto.

Macemma Aksara

Aksara bâḍâ 2 macem:

1.       Konsonan

2.       Vokal

 

KONSONAN

Konsonan bâḍâ 2 macem:

1. Konsonan alos

    a. Konsonan alos ḍhâmmang: b, ḍ, g, j, d

        Contona:

sabâ, bikan, sabu, bâḍâ, manḍi, aḍu, gâgâ’, rogi, rajâ, pejji, juju’, dâbâk, dibâ’, dumeng.

    b. Konsonan alos berrâ’: bh, ḍh, gh, jh, dh

        Contona:

sabbhâr, bhirta’, bhubhâr, ḍhâḍhâ, panḍhi, ḍhukon, ghângan, soghi, ghuru, jhâpa, jhilâ, jhujjhu, dhâlika, dhina, dhisa

2. Konsonan Tajhem

    c, k, m, n, p, t, s, th

    Contona:

maca, coco, cèlo’, kala’, kerrè, koko, maso’, mènta, molè, nabâr, nèser, noro’, pako, pèlè, poco’, takèr, tèkos, tolès, sassa, sosso’, sèbâ’, kattha, masthè, kathomo.

3. Konsonan Marḍuwânè

    w, l, r, y

    Contona:

nyorowa                         nengghuwâ

                      sala                                   bhâlâ

                      ra-kara                            gherrâ

                      anapèya                           ghâbâyyâ

VOKAL

1. Vokal tajhem: a, è, o 

    Contona: mara, sèrè, kombi’, kapè, kèkèr, solo.

2. Vokal alos: â, i, u

    Contona: bâjâ, ghâmpang,  ghârbhu, manḍi, bujâ, billâ.

3. Vokal buwi: e

    Contona: semma’, leppet, lemper, malem, lekkas.

4. Vokal mèrèng: è, i, o,

    Contona: tèotè, settir, soto.

5. Vokal sengseng : a

    Contona: aèng, na’as.

 

Gher-ogher/ Rumus Nyerrat Tolèsan Bhâsa Madhurâ:

Konsonan tajhem +  vokal tajhem

Konsonan alos    +     vokal alos

  

Mènangka bhuktè:

ḍhuḍhit                           

= ḍh konsonan alos, u vokal alos, ḍh konsonan , i vokal  alos

bhâjâ                               

= bh konsonan alos berrâ’, â vokal alos, j konsonan alos ḍhâmmang, i vokal alos

ta’al                                   

= t konsonan tajhem, a vokal tajhem, a vokal tajhem, l konsonan marḍuwânè

mènangan                   

 = m konsonan tajhem, è vokal tajhem, n konsonan tajhem, a vokal tajhem, ng konsonan tajhem, a vokal tajhem, n vokal tajhem.

Manabi bâḍâ:

konsona alos + vokal tajhem

konsonan tajhem    +    vokal alos

Tanḍhâna oca’ kasebbhut bânnè oca’ madhurâ sokkla, nangèng oca’ manca.

Contona: sepatu, kulkas, dokter,

Sepatu = t konsonan tajhem, u vokal alos,

kulkas = k konsonan tajhem, u vokal alos, 

dokter= d konsonan alos, o vokal tajhem

                            

Parlo èkaghâli…….!

Neng bhâsa madhurâ è panotobbhâ oca’ taḍâ’ aksara h, tor e.

Ompama:             kaulâ bânnè kaule

                               sadhâjâ bânnè sadhâjâh

                               saka’ḍinto bânnè saka’ḍintoh

                               Madhurâ bannè Madhure

 

PEDOMAN UMUM EJAAN BAHASA MADURA YANG DISEMPURNAKAN èyatorè pècè' è ka'ḍinto!

VIDEO  JHÂJHÂRBÂ'ÂN CARAÈPON NYERRAT TOLÈSAN BHÂSA MADHUR èyatorè pècè' è ka'ḍinto!