LES-BÂLESSAN PANTUN
Bâkto pon nodhuwâghi pokol 7 bâjâ lagghu. bulâ maso' è sala sèttong kellas, kateppadhân bâkto ghârowa PAT (Penilaian Akhir Tahun). XII MIPA 3 kellassa. Saellana rèd-morèd marè ngalakonè sobâl² sè bâḍâ neng GCR, bulâ manapa' pan-bârâmpan pessen sabâb papangghiyân bâkto ghârowa bisa èsambhât papangghiyân sè ḍi-buḍi ḍâlem pangajhârân sè èlampa'aghi è kellas.
Pessen sè èpanapa' tanto èmolaè kalabân asapora kalamon bâḍâ kasala'an sa'abiddhâ tello taon ngajhâr bhâsa madhurâ, sabâb ghuru bâḍâ è attas angèn (ḍhâbuna ghuru bulâ, Pa' Ajjhi Abdir). Kaḍhâng ghâmpang aghighir, ghâmpang ro-nyoro, ghâmpang marengngo', tor samacemma.
Maènga' rèd-morèd jhâ' ḍâlem sejarah kaoḍi'ânna bâḍâ sèttong kadhâddhiyân sè kennenengnganna è SMA Negeri 2 Songennep. Ghânèko ta' ollè èkaloppaè bân ta' bisa èpongkèrè. Tanto nyelpèttaghi parèbhâsan sè monyèna ''asèl ta' adhina asal''. Sè maksoddhâ maskèya dhâddhi orèng sè ontong otabâ sukses, ta' ollè loppa ka asalla. ''Ngèlmo paḍi'', bân salènna. Sè tanto ta' loppa adhuwâ'âghi rèd-morèd sopajâ dhâddhi orèng sè ontong otabâ sukses, tekka hajhât tor samporna. Èpalappaè kalabân pantun:
Bâḍâ kocèng ngènom ès
Nongko' è pappa kaḍâjâna
Mon la bâ'na dhâddhi orèng suksès
Jhâ' loppa ka ghuru SMAḌÂna
Aoro'a ka Bu' Dawi
Sèrèkajâ kala'aghi
Matoro'a ka bâ'na kabbhi
Bhâsa Madhurâ jhâ' dhina'aghi
Ngèḍingngaghi bulâ apantun rèd-morèd paḍâ jhembhâr kabbhi. Èlang rassa lesso sè samarena ngalakonè sobâl² PAT.
Maksoddhâ jhâ' dhina'aghi molaè ḍâri bhâsana, tatakramana, bhuḍhâjâna. Napè sè èkaollè saabiddhâ ajhâr bhâsa madhurâ èghuna'aghiyâ ḍâlem kaoḍi'ân rè-saarè. Malar moghâ èlmona barokah tor mèghunanè.
Saterrossa bulâ nyacak nangtang morèd, pola bâḍâ sè abâlessa pantun ghi' bhuru. Sanatkala ghânèko bâḍâ morèd bâbinè' sè nonjhung tanang, lajhu males pantun bulâ. Firda Fatimah Zawani nyamana. Firda celloghânna. Orèngnga pajhât pènter, è kellas aktif. Pantunna kadhi nèko:
Mèllè kangkong ka Sorbhâjâ
Pamolèna è baḍḍhâi kalambu
Mator sakalangkong ḍâ' sadhâjâ
Kaulâ pènter karna ghuru
Sorak sè sellaè kopa' asaor mano' ḍâri rèd-morèd.
Bulâ malès kèya:
Mellè sènter ka Ru-bâru
Ka Bhâlighâ atemmo Kè Supa'at
Mon bâ'na pènter polana ghuru
Malar moghâ èlmona manfa'at
Sorak èsellaè pa'-opa' illing tanto ta' ceccèr sabbhân marèna pantun.
Marèna bulâ males pantunna Firda. Sanatkala bâḍâ morèd lakè' sè nonjhung tanang. Rassana dhibi'na ta' narèma mon ghun kanca binè'na sè males pantunna bulâ. Surya Fajar Efendi nyamana. Surya ologhânna. Surya pajhât pènter, tèngka lakona pajhât saè, tor kabilâng morèd sè aktif è ḍâlem kellas, ta' enḍâ' kala ka Firda. Surya pas ngocol pantun kèya:
Ka ghuwâ atemmo supa'at
Pamolèna mellè kowa
Insya Allah èlmona dhâddhi Manfa'at
Èyangghuyâ kantos towa
Sorak tor kopa' apokpak polè samarèna Surya apantun.
Rassana bulâ terro malessa panttunna morèd sè anyama Surya. Sabâb mon ta' èbâles tako' èkoca' kala ka morèd. Saghânèko pon ḍi'-anḍi'na ghuru. Ta' ènḍâ' èkoca' kala ka morèddhâ, maskè saingghuna kala'a. Bulâ pas males.
Namen tèmon arè Ahad
Mellè palappa è ḍâjâna
Kalamon dhika èlmona manfa'at
Ajjhâ' loppa ka ghuru bhâsa madhurâna
Sambi mèsem, morèd sè nyamana Surya apantun polè:
Mellè Kangkong Sareng Sawi
Nyarè temmo kadâjâna
Mator sakalangkong dâ' Pak Harwi
Dâ' èlmo sareng Sadhâjâna
Bâkto ghârowa bâkto nodhuwâghi pokol 9 bâjâ lagghu, tatengngerra bâktona PAT bhâsa madhurâ empon lobâr. Mèlana bulâ pas males pantunna Surya:
Ka Bâluto mellè kalḍu kokot
Bu' Sa'atun nyarè bâlâna'
Sabâb bâktona ella cokop
Les-bâlessan pantun cokop ghân ḍinna'
Bulâ pas ngoca', ''Mon ta' ambu tako' kala engko' kana'.''
Sakabbhinna morèd aghellâ', paḍâ jhembhâr, les-bâlessan pantun ghi' bhuru kellar alompa' maèlang rassa sompek, rassa rèngsa ḍâlem ngollè'è sobâl-sobâl.
Anèko namong sakadhâr carèta nalèka PAT Bhâsa Madhurâ kellas XII MIPA 3 absèn ghânjhil.
(samadasongennep 03 Maret 2021)
